काठमाडौं। मलेसियाको साइबरजया स्थित लिम्कोकविङ विश्वविद्यालयमा हालै सम्पन्न १६औं विश्व योगासन खेलकुद प्रतियोगितामा नेपाली विद्यार्थीहरूले उत्कृष्ट प्रदर्शन गरेका छन्।
अन्तर्राष्ट्रिय योग खेलकुद महासंघ (IYSF) को आयोजनामा अप्रिल ५ र ६ मा भएको यो प्रतियोगितामा नेपालसहित ४० देशका खेलाडीहरूले सहभागिता जनाएका थिए।
प्रतियोगितामा नेपालका तर्फबाट ३० जना विद्यार्थी सहभागी थिए। विभिन्न उमेर समूहमा धेरै नेपालीले पुरस्कार जित्न सफल भएका छन् । ९-११ वर्ष उमेर समूहका बालकतर्फ एसिया प्यासिफिक स्कूल धापासीका प्रयास जंग चौहानले प्रथम स्थान हासिल गरेका छन् । त्यसै गरि रोजमेरी आइडल बोर्डिङ स्कूलका अमिस पटेलले दोस्रो र नेपालकै किरण मगरले तेस्रो स्थान प्राप्त गरेका छन् ।
त्यस्तै, १२-१४ वर्ष उमेर समूहको बालिकातर्फ रोजमेरी आइडल बोर्डिङ स्कूलकी प्रत्यूषा खतिवडाले प्रथम स्थान जितेकी छिन । १२-१४ वर्ष उमेर समूहकै बालकतर्फ भने एसिया प्यासिफिक स्कूल धापासीका बबिन श्रेष्ठले पाँचौं स्थान हासिल गरेका छन् ।
प्रतियोगितामा ९-११, १२-१४ र १५-१७ वर्ष उमेर समूहका बालक/बालिकाका वर्गहरू समावेश भएका थिए।
नेपाल योग खेलकुद संघको समन्वयमा सहभागी भएका यी विद्यार्थीहरूले आफ्नो मेहनत र समर्पणले यो सफलता प्राप्त गरेको बताएका छन्। नेपालबाट सहभागी विद्यार्थीहरूको यो उपलब्धिले अन्तर्राष्ट्रिय मञ्चमा देशको प्रतिनिधित्व र योगप्रतिको लगावलाई थप बलियो बनाएको छ।
योगलाई खेलकुदको रूपमा प्रवर्द्धन गर्दै युवा पुस्तामा शारीरिक र मानसिक स्वास्थ्यप्रति जागरूकता बढाउने उद्देश्य प्रतियोगिताले राखेको थियो।प्रतियोगिताको आयोजक मलेसियन योगासन र मल्लखम्ब संघ (MYMA) ले यो संस्करणलाई अहिलेसम्मकै भव्य र सफल भएको दाबी गरेको छ।
