काठमाडौँ । शहीद सप्ताहअन्तर्गत आज छैटौँ दिन शहीद गङ्गालाल श्रेष्ठ र दशरथ चन्दप्रति श्रद्धाञ्जली अर्पण गरिएको छ ।
काठमाडौँ महानगरपालिकाले आज शहीद गङ्गालाल श्रेष्ठ र दशरथ चन्दले अमरत्व प्राप्त गर्नुभएको स्थान विष्णुमती नदी किनारा शोभा भगवतीमा स्मृति सभा गरी उहाँहरूलाई स्मरण गरेको हो ।
स्मृति सभामा कामपाका उपप्रमुख सुनिता डङ्गोलले शहीदहरूको योगदानको गाथा पुस्तान्तरण गर्नुपर्ने धारणा राख्नुभयो । “आज हामीलाई स्वतन्त्र बनाउन उहाँहरूले दिनुभएको प्राणको आहुति नयाँ पुस्तालाई बुझाउनुपर्छ”, उहाँले भन्नुभयो ।
आम नागरिकको स्वतन्त्रताका लागि सम्पूर्ण शहीदहरूले गर्नुभएको त्यागबाट प्राप्त उपलब्धिहरू हामीले कसरी पाएका छौँ । यस्ता कुरा हामी जनप्रतिनिधिले स्वमूल्याङ्कन गर्ने बेला आएको छ”, कामपा–१५ का वडाध्यक्ष ईश्वरमान डङ्गोलले भन्नुभयो ।
हुकुमी शासनको विरुद्धमा काम गरेको, जनतालाई प्रजातन्त्रका लागि उक्साएको आरोपमा विसं १९९७ माघ १५ गते दशरथचन्द र गङ्गालाल श्रेष्ठलाई विष्णुमती नदी किनारा शोभा भगवती क्षेत्रमा मृत्युदण्ड दिइएको थियो । तत्कालीन समयमा एक अर्काले देख्ने गरेर गोली हानेर कायल गराउन खोजिएको थियो । ज्यानको माया गरेर कायल हुनुभन्दा प्रजातन्त्रका लागि गोली खान तयार भएका उहाँहरूलाई पहिले घुँडाभन्दा तल गोली हानिएको थियो । त्यति गर्दा पनि हार नमानेपछि ज्यान जाने गरी गोली हानेर मृत्युदण्ड दिइएको थियो ।